ელჩი თამარ ტალიაშვილი ევროსაბჭოს მინისტრთა კომიტეტის სხდომაზე სიტყვით გამოვიდა

 

ევროპის საბჭოს გენერალურ მდივანთან სიტყვით მიმართვისას, თამარ ტალიაშვილმა ხაზი გაუსვა გლობალური კრიზისების ფონზე მულტილატერალიზმისა და დიალოგის მნიშვნელობას. მან ყურადღება გაამახვილა ადამიანის უფლებათა ევროპული სასამართლოს მიერ საქართველოს სასარგებლოდ მიღებულ გადაწყვეტილებებზე და მადლობა გადაუხადა ალან ბერსეს ევროსაბჭოს მიერ საქართველოს სუვერენიტეტისა და ტერიტორიული მთლიანობის მტკიცე მხარდაჭერისთვის.

 

საქართველოს ელჩმა, ასევე, სიტყვით მიმართა ევროსაბჭოს საპარლამენტო ასამბლეის (PACE) პრეზიდენტს, თეოდორ რუსოპულოსს და ხაზგასმით აღნიშნა საარჩევნო პროცესის მაქსიმალური გამჭვირვალობის უზრუნველყოფის მიზნით, საქართველოს ხელისუფლების მიერ გაწეული ძალისხმევა. როგორც ელჩმა თამარ ტალიაშვილმა აღნიშნა, საქართველოს ხელისუფლება დიდ მნიშვნელობას ანიჭებს სადამკვირვებლო მისიების მუშაობას და საარჩევნო პროცესზე დაკვირვების მიზნით, არაერთი საერთაშორისო სადამკვირვებლო მისია მიიწვია ქვეყანაში. თამარ ტალიაშვილმა მინისტრთა კომიტეტს ინფორმაცია მიაწოდა ხმის მიცემის ელექტრონულ პროცესთან და დანერგილ დაცულ ტექნოლოგიებთან დაკავშირებით.